خلصت الحرب بلبنان

قعدت بغربتي فلفش مكاتيب

فتش عا وطن ضيَّعوا الزمان

ساكن بقلبي متل الغريب

كل شي بعرف عنّو إسمو لبنان

هيدا اللي بعرفوا ونتفة بعد

عن قمرو الحلو السكران

وناس ما بين المزح والجد

فاتوا بلعبة حرب ونكران

ومتل اللي ما منّو بُدّ

إجتاحت قلوب وعِّت نيران

محيت كل شي إسمو حُب

تركت عيون شعبا حيران

زرعت فيك حقد .. وتبقى

شايف خيّك منّو خيفان

عملت مني ومنّك إعدا

وغفيت عا أرض الإيمان

هزّت حلم ولاد ،  كبار

لا جبال صمدت لا وديان

لا حجر لا شجرة غار

كيف بدك يصمد إنسان؟

منن فكّروا الحرب بتصير

أُبّهة وبدلة وبكرا نيشان

بإيد سلاح وبإيد الضمير

الأوّل للبري التاني الشيطان

قلوبن صارت كهوف مغاوير

تعمل عرس دمو الألوان

ولادن صاروا كلهن نواطير

إسم المِلِّة هوية وعنوان

وما بين الضو وبين العتمة

شوية أمل قاعد بردان

 ياكل صلاة يخزِّء بسمة

ويشهق يا الله ندمان

وهيك السنة ورا السنة

بين الندم وخدعة الغفران

شو هالحكي  والولدنة

ما تصدّق خلصت الحرب بلبنان

                                                                    25-3-2011